Француската полиција денес стави во “превентивен” притвор 34 лица кои утринава стасале во Париз за да учествуваат на протестите на “жолтите елеци”, јавија утринава француските медиуми.
Полицијата кај нив нашла материјал што може да послужи за насилни протести а притворените се главно млади под обвинение дека направиле “група за насилни протести”.
Уште 278 лица биле пресретнати исто така во Париз утринава пред почетокот на протестот кој носи огромен ризик за нови насилства и урбани немири како што тоа се случи минатата сабота.
Денес во Париз се поставени се кордони, откажани се спортските и културни натпревари, а според најавата, на улиците ќе има и оклопни возила.
Францускиот премиер Едуар Филип вчера изјави дека 89.000 припадници на безбедносните сили ќе бидат распоредени ширум земјата. Според него, од 89.000 припадници на безбедносните сили, 8.000 ќе бидат распоредени во Париз, како и оклопни возила.
– Се соочуваме со луѓе кои не се тука за да протестираат, туку за да кршат и сакаме да се снабдиме со средства кои ќе ги спречат да дивеат, рече Филип.
Подготовка како да ќе има војна
Во Париз вчера сите се подготвуваа за четвртиот викенд на протести на „жолтите елеци“. Банките, продавниците и рестораните се подготвени да ги заштитат сопствените деловни објекти пред денешните протести. Банка на Франција постави даски на прозорците, а Операта ги заклучи инструментите поради страв од провала.
Париските власти советуваат контејнерите за отпад да се отстранат, за да не бидат запалени.
Денеска е затворена за посетители и Ајфеловата кула, седум музеи менаџирани од градот Париз помеѓу кои и легендарниот Лувр. Познатите француски дуќани како Галери Лафајет и Прентем исто така ги затворија своите порти за денес. Според проценките, затворањето на дуќаните за еден ден ќе донесе загуба од 8 милиони евра. Затворени се и 36 метро станици а полицијата затвори повеќе клучни булевари и авении за движење.
Странските амбасади во Париз, помеѓу кои и македонската, ги предупреди своите државјани на можни насилства за време на протестите и ги советува да ги избегнуваат демонстрациите и местата во центарот на Париз како Трокадеро. Амбасадите предупредуваат дека протестите можат повторно да станат насилни, а полицијата може повторно да одговори со водени топови и солзавец. Во минатонеделните протести беа повредени повеќе од 130 лица, а над 400 се уапсени во најлошите улични немири во Франција во последните децении.
Власта попушти но можеби предоцна
Движењето „жолти елеци“ започна како протест против предлогот за зголемување на даноците за дизел и бензин, а движењето беше именувано по жолтите елеци што демонстрантите ги носат, а кои возачите мора да ги имаат во своите автомобили.
Под притисок на улицата, француските власти одлучија да ја укинат одлуката за зголемувањето на данкот на горивото, кое беше планирано за следната година. Но, денешните најави за протести најавуваат дека тоа нема да биде доволно да ја смири тензијата во јавноста. Според анкетите, две третини Французи ги поддржуваат протестите на “жолтите елеци”.
Премиерот Едуар Филип на пратениците во Парламентот им рече дека од зголемувањето на данокот сега се откажува во буџетот за 2019 година и порача дека владата е подготвена за дијалог.
Сепак, протестите наскоро ја надминаа својата првична цел и станаа насочени против Владата. Демонстрантите го насочија својот гнев кон претседателот Емануел Макрон, обвинет дека изгубил допир со реалноста. Демонстрантите за Владата велат дека е елита, која нема поим како живее остатокот од земјата.
“Жолтите елеци” ја заразија и Белгија
Движењето на “жолтите елеци” ја зарази и Белгија. Веќе две недели се одржуваат редовни протести на белгиските “жолти елеци” со блокади на патиштата. Минатонеделниот протест донесе исто така урбано насилство а беше опожарена една полициска кола. Протест е закажан и за денес во Брисел, но полицијата е мобилизирана и не очекува големи нереди како тие во Париз.