Специјалното јавно обвинителство ќе го преземе случајот „Монструм“, дознава НОВА.
Од СЈО, го побарале предметот од судот и тој им бил доставен вчера. Официјално, одлуката дали СЈО има надлежност над овој предмет, ќе биде позната за една недела.
Денеска, судењето за случајот „Монструм“ по вторпат беше одложено поради тоа што во судот не дојде јавен обвинител. Судењето за „Монструм“ се врати од почеток откако Врховниот суд ги укина доживотните затворски казни за обвинетите кои беа ослободени од притвор. На рочиштето на 12 февруари обвинителот Наум Пановски рече дека остануваат на првичното обвинение за тероризам.
Петкратното убиство кај Смилковското Езеро се случи на 12 април 2012 година. За тероризам на доживотен затвор беа осудени Алил Демири, Африм и Агим Исмаиловиќ, Фејзи и Хаки Азири и Сами Љута. Алил Демири и Африм Исмаиловиќ се осудени во отсуство и по нив е распишана меѓународна ппотерница.
Судењето е одложено за 17 април.
Освен, за „Монструм“, Специјалното јавно обвинителство ќе го преземе и предметот „Шпион“, за обвинетиот новинар Зоран Божиновски, дознава НОВА.
За „Шпион“ казни затвор од една до 15 години добија 14 обвинети. Највисока казна затвор од 15 години доби првообвинетиот, поранешниот разузнавач Марјан Ефремов, кој беше обвинет дека бил мозокот на групата, која според обвиненито собирала доверливи информации кои потоа Ефремов ги предавал на грчки и унгарски разузнавачки служби.