Кубанците денеска бираат нов Парламент кој следниот месец ќе го избира новото водство а со тоа и наследникот на претседателот Раул Кастро, што значи дека по шест децении, државата ќе ја води некој друг што не е Кастро.
Околу осум милиони гласачи постари од 16 години ќе гласаат за 605 кандидати за исто толку места во Парламентот.
Кубанците гласаат и за 1.265 покраински пратеници, првпат откако кон крајот на 2016 година почина водачот на револуцијата од 1959 година, основачот на комунистичка Куба, Фидел Кастро.
Иако исходот од изборите е речиси познат, за многу Кубанци ова е најважниот настан последните години, бидејќи избираат нови челници.
Раул Кастро минатата година објави дека нема да бара нов мандат. Се очекува дека негов наследник ќе биде сегашниот потпретседател, 57-годишниот Мигуел Диаз-Канел, инженер и поранешен министер за образование.
Кастро, речиси сигурно, ќе има место и во парламентот и се очекува дека и натаму ќе има големо влијание врз армијата.