Блерим Река, кој беше кандидат за македонски претседател од Алијансата на Албанците и на движењето „Беса“ на последните избори, е нов министер за европска надеж на Косово. Професорот и амбасадор на Македонија во мисијата во Европската унија во периодот од 2006 година до 2010 година, ја прифати понудата на новиот премиер на Косово, Албин Курти и стана дел од неговиот кабинет кој беше изгласан во Приштина.
За Курти гласаа 66 пратеници, воздржани беа десет и ниту еден против во 120-членото Собрание на Косово. Пред гласањето, собраниската сала ја напуштија пратениците на опозициските партии на Албанците, Демократската партија на Косово, Алијансата за иднината на Косово и Социјалдемократската иницијатива, а воздржани беа десетте пратеници на најголемата партија на косовските Срби, Српската листа (СЛ).
Идниот кабинет на Курти ќе има 15 министерства и двајца вицепремиери. По шест од министерствата се доделени на ВВ и на Демократскиот сојуз на Косово (ЛДК), две ќе води Српската листа и едно групата „Г-6“ на другите немнозински етнички заедници.
Министри од редовите на „Самоопределување“ се: Албулена Хаџиу за правда, Глаук Коњуфца за надворешни работи, Бесник Бислими за финансии, Розета Хајдари за економија, Арбен Витиа за здравство и Блерим Река за евроинтеграции, додека на местото втор вицепремиер е избран Хаки Абази.
Прв вицепремиер ќе биде Авдулах Хоти од ЛДК, додека министри од партијата на Иса Мустафа ќе бидат и Антон Ќуни за одбрана, Агим Велиу за внатрешни работи, Љумир Абиџику за инфраструктура, Бесиан Мустафа за земјоделство, Хикмете Бајрами за образование и Вљора Дурмоши за култура.
Од претставниците на Српска листа, Далибор Јевтиќ ќе биде министер за заедници и враќање додека Иван Милоевиќ ќе раководи со ресорот за регионален развој. Член на кабинетот на Курти од немнозинските етнички заедници ќе биде Емилија Реџепи која ќе биде на чело на Министерството за администрација и локална управа.
По положувањето на заклетвата, новиот косовски премиер одржа пригоден говор, во кој порача дека ќе владее отчетно и транспартно, врз основа на волјата на граѓаните. Курти вети напорна работа за подобрување на животот на сите граѓани на државата, а на надворешен план нагласи дека Косово ќе остане на патот на евроатлантските интеграции и ќе ги негува врските со земјите сојузнички, при што посебно ги спомена Албанија и САД.
„Денеска отвораме ново поглавје. Она што се чинеше невозможно изгледаше така само на прв поглед и еден народ кој го одби потчинувањето ја направи промената. Денеска не победија ВВ и ЛДК, победија граѓаните на Косово кои секогаш кога се соочуваа со неправда се креваа на нозе. Ветувам дека ќе бидам премиер на сите, ќе го слушам гласот на секој граѓанин“, изјави Курти.