Покрај пациентката кај која вчера беше потврден коронавирус, на Инфективната клиника во меѓувреме се тестирани уште две лица. Тестот кај едното покажа негативен резултат, а кај второто парцијално позитивен и се прават дополнителни тестирања, информира министерот за здравство, Венко Филипче.
„Едниот е возач на камион кој патувал преку северна Италија со симптоми на грип и неговиот тест е негативен, а вториот случај е жена која со сопругот била на патување во Рим. Нејзиниот тест е само парцијално позитивен што може да биде вкрстена реакција од други вируси. Затоа се прави дополнително тетсирање за да се отстранат сомнежите. Резултататите ќе бидат готови за два часа“, истакна Филипче во изјава за медиумите на Вториот Форум за национално здравје.
Тој посочи дека пациентката со потврден коронавирус е во добра состојба и оти во меѓувреме се исконтактирани и ставени во домашна изолација и лицата кои биле во контакт со неа и со другите патници во комбето со кое се превезувале. Се досега укажува дека лицата не биле во контакт со голема маса луѓе, нагласи министерот за здравство.
Како што најави Филипче, денеска во 13 часот ќе има состанок Комитетот за координација на активностите заедно со припадници на МВР на кој ќе биде утврдено дали ќе продолжи домашната изолација за лицата или тие ќе бидат преместени во центрите за изолација на инфективните одделенија.