Еден инфектолог и една медицинска сестра од хируршката сала на Одделението за ортопедија во штипската Клиничка болница се позитивни на коронавирус со што бројката на заразени здравствени работници во оваа установа се искачи на шест. Случај со пациент на кого му требало итна операција на ортопедија, од минатиот петок во самоизолација смести четворици здравствени работници, а една сестра е позитивна.
Директорот на Клиничка болница-Штип, Ален Ѓеорѓијев вели дека епидемиологот направил епидемиолошка анкета со вработените во овој оддел по што од болницата се преземени мерки. Ѓеорѓијев на денешната прес-конференција истакна дека работата на Инфективното одделение овие денови ќе биде нормализирана со враќање на 10 здравствени работници.
„На работа се враќаат осум медицински сестри, еден инфектолог и една болничарка чии два теста покажаа негативни резултати на коронавирусот. На нашиот инфектолог во моментот и помага и лекарка од Кочани“, рече Ѓеорѓијев.
На Одделението за интензивна нега, иако еден анестезиолог е заразен, нема проблеми со кадарот, оцени Ѓеорѓијев, бидејќи на работа се и специјализантите. Тестовите, и покрај тоа што беа приоритетни за здравствените работници, доцнеа по неколку денови, проблемот, нагласи, ќе се надмине со доставување во лабораторијата во МАНУ што денеска не стартуваше поради технички причини.
Досега од штипската клиничка болница се тестирани 18 здравствени работници. На инфективното одделение се хоспитализирани вкупно 14 пациенти од источниот регион.
„Кај девет пациенти кои се сместени на нашето одделение е потврдена корона-инфекција. Една пациентка е пуштена на домашно лекување, има два негативни бриса и многу скоро ќе биде прогласена за излекувана. Но, на најзино место имаме примено нов пациент така да повторно имаме девет пациенти кои се лежечки и сега веќе имаме и пет пациенти кои се сомнителни на корона-инфекција. Утринава е примен уште еден пациент од Кочани чија клиничката слика укажува дека е корона инфекција, но тоа треба да се докаже“, рече Ѓеорѓијев.
Тој е благодарен на општествено-одговорните компании кои на сметката на болницата досега донираа 600.000 денари, а дополнително над 5.000 евра се донирани во заштитна опрема за здравствените работници.