Градоначалникот на Киев, Виталиј Кличко, изјави дека постојат стравувања оти под урнатините по нападите врз центарот на градот би можело да има затрупани луѓе.
Русија ја нападна Украина со балистички ракети и со беспилотни летала, при што загинаа најмалку 14 луѓе, а најмалку 22 беа повредени во еден од најсмртоносните напади врз Кијив годинава, објави „Би-би-си“.
За време на нападот, кој почна по полноќ во средата, началникот на Кијивската градска воена управа, Тимур Ткаченко, изјави дека „непријателот повторно масовно го напаѓа Кијивскиот регион“.
Тревогата за воздушен напад траеше повеќе од еден час, додека Кијив и неговата околина беа погодени од повеќе бранови балистички ракети. Кијивската воена управа соопшти дека во нападите биле оштетени станбени згради и магацини.
Ткаченко изјави дека деветмина загинале во Бориспиљскиот округ, четири лица во Бучанскиот округ и едно во Фастивскиот округ.
Украина ги повика своите сојузници да ѝ испорачаат повеќе американски пресретнувачки ракети за системите „Патриот“, за да може да се брани од руските балистички напади.
Руското Министерство за одбрана соопшти дека погодило логистички центри и центри за снабдување во Кијив и во околниот регион.
Овие центри беа вклучени во складирањето и во испораката на различни видови оружје и воени материјали, како и во производството и дистрибуцијата на беспилотни летала, соопшти Министерството.
Оттаму тврдат дека во близина на црноморското пристаниште Одеса погодиле и три товарни брода „кои превезувале оружје и воена опрема“.