Советот за безбедност на Обединетите нации гласаше за воведување дополнителни санкции врз Северна Кореја по шестата и најмоќна нукеларна проба што ја изведе на почетокот на овој месец.
Со деветата резолуција на Советот за безбедност што се однесува на санкциите врз Северна Кореја се предвидува забрана на извоз на текстилни производи од земјата и ограничување на увоз на сурова нафта.
За да се добие поддршката од Русија и Кина, резолуцијата требаше да претпри извесно ублажување. Во претходната верзија беше предложено целосно ембарго на нафтени производи за Северна Кореја.
Постојаната претставничка на САД во ОН, Ники Хејли изјави дека нејзината земја не сака војна со Северна Кореја, нагласувајќи дека Пјонгјанг „се уште не ја преминал онаа точка, од која нема враќање назад“.
– Доколку Северна Кореја се согласи да се откаже од нуклеарната програма, таа може да ја спаси иднината на земјата. Ако докаже дека може да живее во мир, светот ќе живее во мир заедно со неа, истакна Хејли, откако Советот за безбедност на ОН гласаше за нови построги санкции против Северна Кореја.
– Резолуцијата немаше да биде усвоена доколку не беа толку силни врските меѓу американскиот претседател Доналд Трамп и кинескиот претседател Си Џипинг, додаде таа.
Кинескиот амбасадор во ОН Лиу Џиеји ја повика Северна Кореја да погледне сериозно кон очекувањата и волјата на меѓународната заедница и ги повика сите земји во конфликтот да ја зголемат самокотролата и да не ги зголемуваат тензиите.
Рускиот претставник Василиј Небензија нагласи дека неговата земја ги поддржува новите санкции против Пјонгјанг, бидејќи не ги прифаќа неговите нуклеарни амбиции и смета дека треба категорично да се реагира на последното нуклеарно тестирање.
Тој објасни оти Москва оценува дека мерките за финансиски притисок врз Северна Кореја практично се „исцрпени“, а понатамошните рестрикции би можеле да бидат еднакви на „обидот да се задуши“ економијата на земјата што може да предизвика голема хуманитарна криза.
Небензја изјави дека, игнорирањето на руско-кинескиот предлог за обновување на дијалогот со Северна Кореја, претставува „голема грешка“ на Советот за безбедност, наведувајќи дека усвојувањето на нови санкции наскоро ќе ги погоди невините цивили и нема да го намали финансирањето на нуклеарната и ракетната програма на Пјонгјанг.
Тој го повика генералниот секретар на ОН Антонио Гутереш да помогне да се стигне до преговори, а не да се дејстува во санкции.
Пјонгјанг вчера им се закани на САД дека доколку инсистираат на дополнителни санкции, ќе се соочат со „страдање и болка“.