Денешната одлука со мнозинство гласови на пратениците во Собранието да не се прифатат предлозите за измени во Законот за медиумите, амбиентот ниту се менува ниту се мрднува од почетната точка која се најде пред преговарачките групи на четирите најголеми партии, реагира новинарскиот еснаф.
Со 64 гласа „против“ мнозинството пратеници одлучија да го отфрлат предлогот за измени во Законот за аудио и аудио визуелни медиумски услуги. Предлогот за разгледување беше поднесен од опозициската СДСМ на барање на новинарските здруженија и организации, а предвидуваше реформи во програмскиот совет на МРТ и во советот на Агенцијата за медиуми, како и целосно финасирање на МРТ од државниот буџет.
Ваквото гласање не ги изненадува новинарските работници, кои потенцираат дека со ова само се докажува дека условите за кредибилни избори не се исполнети.
Според претседателката на Синдикатот на новинари и медиумски работници, Тамара Чаусидис, денешното гласање значи дека на одредени политичари воопшто не им требаат промени кај медиумите бидејќи им годи.
– Денешното гласање значи дека оние што го имаат мнозинството во Собранието, како и на преговорите во Клубот на пратенците не сакаат реални промени на медиумската состојба. Најмногу им пречи департизација на регулаторните тела и финансиска независност на Јавниот сервис, вели Чаусидис за НОВА, дополнувајќи дека истите тие владеат преку медиумите.
Дека не е исполнета обврската од Пржинскиот договор смета и Жанета Трајкоска од Институтот за комуникациски студии, кој сепак вели имала контролиран оптимизам дека сепак денес можеа да започнат промените.
– Не ме изненадува гласањето во Собранието денеска. Ние како повеќе организации кои ги поддржувавме измените во Законот за медиуми имавме сепак некој контролиран оптимизам дека партиите се освестиле и пред избори ќе работат на подобрување на условите, но јасно е кој како гласаше, вели Трајковска.
Според неа, барем во поглед на медиумските реформи, условите за кредибилни избори не се исполнети, а одредени политички структури сакаат да продолжат со пласирање на својата вистина.
– Измените во медиумите беа дел од Договорот од Пржино и ние и меѓународната заедница се надевавме дека оттука ќе почнеше процес за подобрување на состојбата со медиумите, меѓутоа ова покажува дека одредени партии напротив ги интересира да ги користат медиумите за да пласираат своја пропаганда. Со ова, барем во медиумскиот дел, сметам дека не се исполнети условите за кредибилни избори, вели Трајкоска.
Новинарските и медиумските здруженија за утре најавија прес-конференција на која подетално ќе се произнесат по денешното гласање.
Предлогот по кој денеска се гласаше во Собранието инаку е ист како тој на европскиот медијатор Питер Ванхауте за итна измена и дополнување на Законот за аудио и аудио визуелни медиумски услуги, како добра основа за вовед во медиумските реформи во Република Македонија.
Неговите предлози сепак од старт беа погазени од владејачката партија ВМРО-ДПМНЕ, која рече дека “експерименталните“ предлози на Ванхауте ги немало во ниедна друга земја од Европската унија и тие не се согласуваат со нив.
Како и да е, лидерот на ВМРО-ДПМНЕ и екс-премиер Никола Груевски неодамна на самиот датум кога првично беше планирано распуштањето на Парламентот за одржување на изборите на 24.април потенцираше дека преговори за медиуми сигурно нема да има до 5.април, дека постоечкиот закон е соодветен а за тоа добил уверување и од меѓународната заедница.