Новинарите во весниците „Утрински весник“, „Вест“ и „Теа модерна“ бараат јавниот обвинител, Марко Зврлевски, да отвори истрага за работењето на компанијата „Медиа принт Македонија“.
Тие на прес конференција, освен Јавното обвинителство, побараа своја истрага и проверка на финансиското работење да извршат и УЈП, Финансиската полиција и Трудовата инспекција.
По обелоденувањето на документи од 2015 година, според кои директорката и една од поранешните сопственички на „МПМ“, Јана Станисављева, месечно добивала плата од 25.000 евра и плус надоместок од 1 милион и 345.000 денари, Синдикатот на новинари и медиумски работници, ЗНМ и новинарите од МПМ се сомневаат дека има индиции за криминални активности од страна на менаџментот на фирмата. Новинарите се уверени дека фирмата свесно била финансиски уништена, а вработените избркани од работа.
Во петокот излегоа последните броеви на „Утрински весник“ и „Вест“, кои сега функционираат како портали и имаат само неколкумина вработени. Од трите дневни весници продолжи да се печати само „Дневник“, а вработените се пријавени на определено време од шест месеци.