По барање на адвокатот Никола Додовски, судијката ги отстрани новинарите додека се чита дописот од Министерството за внатрешни работи до СЈО, иако според специјалната јавна обвинителка Ленче Ристоска тоа не е класифициран документ и нема потреба да се отстрани јавноста, јави „А1 он“.
Ова е второ подготвително рочиште, иако судијката на минатото рочиште најави дека ќе биде главно рочиште.
Во овој случај обвинети се поранешниот началник на петтата управа во УБК Горан Грујовски и уште шестмина други вработени во оваа Управа. Тие се товарат дека уништиле 2.047 службени списи, од кои 22 на тајната полиција за набавка на опремата за следење на комуникациите.
Судот на првото рочиште побара од СЈО да обезбеди дозвола од УБК за да ги користи доказите кои биле доверливи и за добивање потврда кои од податоците можат да бидат јавни, а кои остануваат доверливи.
Ова беше прво обвинение на СЈО по кое дојде до судење, а го застапуваат обвинителите Ленче Ристоска и Трајче Пеливанов.