Во Основниот суд Скопје 1 денеска продолжи судењето на обвинетите за упадот во Собранието на 27 април 2017 година. На денешното рочиште сведочеше новинарка која рече дека додека претседателот на Собранието Талат Џафери давал изјава во прес центарот, на мониторите се гледало како толпа луѓе влегува во Собранието по што некој му дал знак да запре.
„Според мојот впечаток целта беше Заев. Викаа ќе ве убиеме, шиштарски предавници, а покрај него и Џафери и Зијадин Села. Удираа со се’ што имаа во рацете, стативи од камерите, копја од знамињата, па дури и маваа со мебел. Кога се слушна истрел толпата се повлече, а за кратко време состојбата ескалираше и сите удираа по секого, па освен пратениците цел беа и новинарите. Тогаш го заработив првиот удар од постар човек кој ме удри во ѕидот и ми рече дека работам во предавничка телевизија“, рече новинарката.
Таа сведочеше дека меѓу луѓето што упаднаа во прес центарот препознала двајца соседи од кои едниот и рекол, “излегувај ќе биде гадно”.
„Полиција немаше, ама јас мислев се’ уште е рано. Пратеникот Села стоеше зад другите пратеници. Излезе напред по што го опколија и почнаа да го удираат. Еден со сива качулка кон Села замавна со дрвен стап, а истиот потоа и мене ме удри по рака. Потоа шест до осум луѓе го удираа по глава и буквално се бараше место кој да го шутне. Пред да го изнесат некој го фати за коса и се виде дека целото лице му е со крв. Додека го влечеа оставаше крвави траги“, кажа новинарката.
Таа уште се присети дека поради тоа што друга новинарка снимала со телефон, неколкумина од насилниците ги опколиле и продолжиле со насилството.
„Бидејќи колешката снимаше со телефон не’ опколија неколкумина и бараа да ги избрише снимките. Колешката ја внесоа во една просторија, а јас кога се обидов да влезам еден ме удри по лице. Отидов кон влезот каде што имаше собраниско обезбедување и низ солзи го замолив да ми помогне, бидејќи колешката е затворена сама со четворица. Тој само ми рече, неможам ништо да направам“, сведочеше новинарката.
Таа пред судот кажа и дека присутните во Собранието, таа вечер биле оставени сами на себе, без помош од полицијата. Претходно на денешното судење сведочеше и тогашниот пратеник, сега градоначалник на општина Шуто Оризари, Курто Дудуш кој, според неговиот исказ, Игор Дурловски бил човекот кого тој го видел како ги насочува луѓето кон собранискиот прес центар. Денеска треба да сведочат и заменик-министерот за внатрешни работи Агим Нухиу и директорот на Бирото за јавна безбедност Сашо Тасевски.