Во Специјалното јавно обвинителство денеска беа поканети новинарките Сашка Цветковска и Наташа Стојановска во врска со нивната работа на сторија која откри како владејачката партија ги заплашува вработените во администрацијата да носат списоци со сигурни гласачи.
Новинарките Цветковска и Стојановска ги добија списоците од анонимен извор, а на лицата на списоците им се јавуваа на телефон претставувајќи се како вработени во Центарот за комуникации на ВМРО ДПМНЕ. Имаше и шокантни изјави во кои директор на подрачен фонд за здравство обелодени дека одредени гласачи се уценуваат со процедури како ин-витро.
Истрагата отвори и тогашниот Државен јавен обвинител Љупчо Шврговски, но истата брзо беше затворена под образложение дека нема доволно докази. ВМРО-ДПМНЕ сторијата ја оцени како манипулација и безочна лага. Подоцна во својот извештај за изборите од 2011 година од мисијата на ОБСЕ/ОДИХР кои ги набљудуваа изборите, за наодите на новинарите од А1 напишаа дека претставуваат веродостојни докази за заплашувања и притисоци врз државните службеници. Партиски активисти барале списоци со одреден број на гласачи од вработените во администрацијата под закани дека ќе ги загубат работните места, а доказите на мисијата покажуваат дека ова се правело уште пред распишување на изборите.
– На ОБСЕ/ОДИХР ѝ беа презентирани електронски пораки кои покажуваат дека барањата ги упатувал партиски активист на ВМРО-ДПМНЕ до локалните градоначалници и раководители на образовни институции, пред објавувањето на изборите. Секое партиско дејство, од страна на вработени во државни органи, сторено во текот на работното време, претставува злоупотреба на државните ресурси за потребите на партијата“, стои во извештајот.
ОБСЕ демонстрираше недоверба во истрага на Шврговски и побара обвинителот да направи се за да ги расветли овие случаи.