Денеска почнува со работа новата Европската комисија (ЕК) на чело со Урсула фон дер Лајен, прва дама на функцијата. Главното извршно тело на Европската унија (ЕУ) по својот состав и функции наликува на влада со тоа наместо терминот министер се користи комесар. Секој е задолжен за различен ресор и доаѓа од различна земја членка на ЕУ.
Новиот состав на Европска комисија обезбедува највисок родов баланс досега, односно од 27 највисоки позиции, 11 ги држат жени. Комисијата, која во наредните пет години ќе биде една од трите најважни институции на ЕУ, покрај Парламентот и Советот, ја сочинуваат претседателката, 25 комесари и шефот на дипломатијата на ЕУ, кој воедно е потпретседател на ЕК.
Претседателката на Комисијата објави дека во фокусот на работа на нејзиниот тим во текот на мандатот ќе биде зајакнување на улогата на ЕУ во светот, заштита на климата, дигитализација, но и доближување на Западниот Балкан до Унијата. Фон дер Лајен истакна дека во работата со регионот најмногу ќе и помогнат шефот на дипломатијата на ЕУ и комесарот за проширување.
Досегашната шефица на дипломатијата на ЕУ, Федерика Могерини, ја менува досегашниот министер за надворешни работи на Шпанија, Жозеп Борел. Претставувајќи ја својата програма, тој изјави дека сака лично да се посвети на „реформите и процесот на интеграција на Западен Балкан“. Борел во истовреме ќе посредува и во дијалогот меѓу Белград и Приштина.
Оливер Вархељи го презема ресорот за проширување од Јоханес Хан, во момент кога во ЕУ се води расправа за реформите во пристапната политика. Вархељи оцени дека не треба да се менува целата рамка на политиката за проширување, туку дека треба да се подобри методологијата.
Европската комисија соопшти дека новиот комесар за проширување во вторник на 3 декември ќе учествува на конференција на високо ниво посветена на европската интеграција на Западен Балкан.