Парламентот на Турција во неделата го усвои новиот Устав со кој се зголемува одлучувачката власт на претседателот Реџеп Таип Ердоган. Со новата реформа, усвоена во текот на ноќта, му се овозможува на Ердоган да остане на власт најмалку до 2029 година.
Новата реформа ја укинува функцијата на премиер и му дава право на претседателот да именува или отпушта министри. Наместо премиерското место, во владата ќе има потпретседатели.
Парламентот и претседателот ќе бидат бирани за време на истите избори. Следните избори во Турција се планирани за 3 ноември 2019 година.
Партијата на Ердоган, Партија на правда и развој (АКП), собра 330 гласа со помош на националистичката десница од партијата МХП, односно мнозинството потребно за усвојување на новиот Устав. Потоа Уставот ќе биде изнесен на референдум најверојатно на пролет.
Новите 18 члена на Уставот ја зајакнуваат власта на Ердоган. Минатата недела во турскиот парламент дојде до физичка пресметка кога новиот текст за Уставот беше за прв пат разгледуван.
Уставната реформа ќе му дозволи на Ердоган директно да интервенира во судството преку именување на судиите.
Опозицијата и се спротивстави на оваа реформа поради авторитарниот начин на владеење на сегашната власт и претседателот Ердоган, особено по неуспешниот пуч од 15 јули 2016 година.
Сегашниот турски Устав датира од 1982 година а беше усвоен во воениот пуч од 1980 година. Уставот му гарантира незвисност на судството од власта. Но сегашната реформа му дозволува на претседателот директно да интервенира во судството преку именување на судиите и другите високи функционери од оваа област.