Американскиот претседател Доналд Трамп планира да го смени државниот секретар Рекс Тилерсон со актуелниот шеф на ЦИА, Мајк Помпео, објави „Њујорк Тајмс“.
Сенаторот од Арканзас, Том Котон би го заменил Помпео на водечката функција во ЦИА, пишува весникот, наведувајќи дека шефот на персоналот на Белата куќа, Џон Кели бил креаторот на овој план.
Во јавноста е познато дека односите меѓу Трамп и Тилерсон се нарушени изминатите неколку месеци бидејќи наводно Тилерсон во октомври на Трамп му рекол дека е морон.
По прашањата на новинарите, Тилерсон веднаш го отфрли ова како шпекулација.
Но и ако се погледнат ставовите на американскиот претседател и на шефот на американската дипломатија, се забележува дека двајцата можеби и не се во најдобра комуникација.
Тилерсон неодамна рече дека треба да се остане мирен по нуклеарние провокации од Северна Кореја, по што Трамп пак, познат по користењето на социјалната мрежа Твитер, објави:
„Му кажав на Рекс Тилерсон, нашиот прекрасен Државен секретар дека си го троши времето пробувајќи дека преговара со малиот човек-ракета. Зачувај си ја енергијата Рекс, ќе го направиме она што мораме“.
Тогаш во јавноста се појавија шпекулации дека амбасадорката на САД во Обединетите Нации, Ники Хејли ќе го замени Тилерсон, но таа минатиот месец изјави дека нема да ја прифати функцијата доколку и биде понудена.
„Њујорк Тајмс“ пишува дека Трамп се уште го нема одобрено планот, но дека се очекува истиот да биде спроведен кон крајот на 2017 година или во првите денови од 2018.
Доколку се случи тоа, Рекс Тилерсон ќе биде државниот секретар со најкратка кариера.