Министерот за животна средина и просторно планирање, Насер Нуредини, истакна денеска дека препораката на ресорното Министерство е во заштитените подрачја да се легализираат само дивоградбите кои се дом на жители.

– Сакам да се повикам на Законот за нелегални градби каде јасно е укажано дека без дозвола од МЖСПП кадешто ќе се предвидува и постоење на зелени површини околу тие градби, нема да се добијат дозволи за градба – тоа се нашите укажувања. Законот се врати пак на Влада, на владина расправа, нашата препорака од МЖСПП е дека треба да се легализираат само оние градби коишто се во сопственост на граѓани на жители кои живеат во нив, рече Нуредини.

За зелената агенда на ДУИ, министерот рече дека „сите се движиме кон Европа“.

– Нашата цел е Европа и во таа смисла сакаме да се вклопиме во зелената агенда на Европа. Сакаме да ги имлементираме зелените стандарди за квалитетен живот на граѓаните. Наш приоритет е граѓаните да живеат во заштитена еколошка средина, но исто така граѓаните да имаат пристап и право на чиста вода за пиење, на прочистена индустриска отпадна вода. Ние веќе две години работиме на таа зелена агенда, додаде министерот.

Во врска со сечата на дрвја на улицата „Орце Николов“, Нуредини рече дека тоа е одговорност на секоја одделна општина.

– Доколку граѓаните не се согласуваат со такви одлуки, такви одлуки не треба да се случуваат. Ние ги поттикнуваме граѓаните. Нашата политика се стреми кон тоа да има се повеќе зеленило во градот. Но сепак ќе речам тоа е одлука на секоја општина, посочи министерот.