Барак Обама остро го критикуваше денес републиканскиот кандидат за претседател ма САД Доналд Трамп.

“Тој е многу лошо подготвен за оваа функција. Не е квалификуван за да биде претседател”, рече Обама на прес конференција во Вашингтон.

“Истото го реков и минатата недела. Тој постојано тоа го докажува”, инсистираше Обама потсетувајќи на јавните критики за контроверзниот Трамп околу родителите на еден американски војник загинат во Ирак во 2004 година.

Родителите на овој војник беа поканети на конвенцијата на која Хилари Клинтон беше именувана за демократски кандидат за претседател на САД.

Таткото и мајката на војникот со пакистанско потекло излегоа на говорницата и упатија критика до Трамп. Пред портретот на нивниот син таткото изјави “вие Доналд Трамп, ништо не сте жртвувале, вие никого не сте загубиле”, рече таткото прашувајќи го Трамп дали го читал американскиот Устав.

Овој говор одекна како бомба низ државата која во овие родители виде ужалено семејство. Но, Трамп не го делеше овој впечаток и во родителите виде еден муслиман и негова жена која не смее да зборува:

“Ако ја погледнете жената која стоеше до него, ќе видите дека таа немаше што да каже. Најверојатно и било забрането да зборува”, коментираше Трамп во едно интервју.

На ова одговори мајката на војникот:

“За мене е многу тешко да зборувам… Доналд Трамп има деца кои ги сака. Дали навистина треба да се прашува зошто не зборував?”, напиша таа во колумна во Вашингтон Пост.

За Обама е неприфатливо да се критикува на овој начин семејството кое “направило огромна жртва за оваа земја”.

Актуелниот претседател додаде дека Трамп прави големи грешки и покажува основно незнаење за Европа, Блискиот Исток и Азија “што значи дека не е подготвен за оваа функција”.

Обама упати критика и до лидерите на републиканската партија кои го поддржуваат Трамп:

“Има моменти кога треба да се каже – доста”, рече Обама и ги запраша републиканците: “Зошто се уште го поддржувате? Што покажува тоа за вашата партија и нејзиниот претставник?”