Скопската обиколница беше кобна за загинатите, за кои се уште нема официјална бројка, во невремето кое пред два дена го зафати Скопје и околината. Се уште не е познато како загинале луѓето кои на 6 август вечерта се затекнаа токму на оваа делница околу Скопје. Засега сведок се само сликите и снимките кои се објавуваат на социјалните мрежи и во медиумите,а кои говорат за хоророт кој се случувал на скопската обиколница и борбата за живот, која за жал некои ја загубија.
На фотографиите по потопот, може да се види како целосно е кренат асфалтот, како да станувало збор за земјотрес со силен интензитет, а не за пороен дожд.
Скопската обиколница која е со вкупна должина од 26,7 километри се градеше неколку години. Вредноста на целата обиколница е околу 135 милиони евра.
Според официјални информации од интернет страната на Владата, за неа се дадени 70 милиони евра, од кои 32,3 милиони евра кредит од Европската банка за обнова и развој – ЕБОР, 24,6 милиони евра од Европската инвестициска банка, а останатите од Буџетот на Република Македонија.
Обиколницата на Скопје е автопат со четири ленти, со широчина од 27,5 метри, која поминува под јужните падини на Скопска Црна Гора, покрај селата Стајковци, Смилковци, Брњанци, Кучевишка Бара.
Главниот надзор на изведбата на втората фаза од обиколницата, Бранко Стефановски, од Градежниот институт „Македонија“ потенцира дека изградбата на оваа делница се одвивала без проблеми и на задоволство на главниот изведувач – грчка „Терна“, која нема никакви забелешки ниту на работата на подизведувачот – скопски „Бетон“, ниту пак на Фондот за патишта.“, пишува во соопштението од Владата кога почнала изградбата втората делница од обиколницата.
Тогашниот премиер Никола Груевски во 2009 година свечено ја пушти во употреба втората делница од скопската обиколница, на потегот од Оризари до Сарај, во должина од 11,8 километри. Делницата е дел од Коридорот 8 и ќе ја поврзува Македонија со Бугарија и Албанија.
„Инвестирањето во инфраструктура претставува инвестирање во подобра бизнис-клима и привлекување домашни и странски инвеститори, во стопански раст, непречен и брз проток на лица и стоки, како и во подобрување на квалитетот на животот на граѓаните вклучувајќи го и еколошкиот”, рече премиерот Груевски на отворањето на делницата.
Тој истакна дека до крајот на годинава се очекува да биде отворен и дел од обиколницата од Хиподром до Оризари со што, како што кажа, за 30 проценти ќе се намали сообраќајот во Скопје и ќе се подобри комуникацијата, рече Груевски кога ја пресече црвената панделка.
Директорката на Фондот за магистрални и регионални патишта Наташа Волкановска, тогаш во 2009 година, истакна дека проектот е од огромно значење за Скопје и Македонија. Таа посочи дека на овој дел од обиколницата две години се работело интензивно.
Делови од обиколницата освен Бетон, градела и скопската градежна фирма Гранит. Во невремето особено беше уништен тој дел од делницата. НОВАТВ испрати прашања до Гранит, за проектот, како и за изградбата на обиколницата, но и на градежната фирма која го вршела надзорот. Одговорите ги чекаме, па ќе бидат објавени кога ќе ни ги достават.
На делот каде што е изграден патот во текот на работата се подигнати 3 милиони метри кубни земјиште, 8.000 тони арматура и над 300 илјади метри квадратни асфалт. За првпат во Македонија и единствено на овој дел од делницата се поставени звучни ѕидови, а тука е лоциран и најголемиот мост во државава долг 630 метра. Според неа, патот е направен по сите европски стандарди.
Градоначалникот на Скопје не чувствува одговорност за смртта на загинатите и одговорноста ја префрли на „виша сила“, односно на „водената бомба“ над Скопје, како што го нарече поројниот дожд. Никој од политичарите од власта, засега не презеде одговорност, ниту пак се чувствува за одговорен за однесените човечки животи.
За одговорноста засега потсетуваат само сликите од пустошот кој остана на обиколницата. Европските стандарди се удавија во македонската „водена бомба“.