Канцеларијата на ОБСЕ за демократски институции и човекови права (ОДИХР) денес официјално ја започнува Набљудувачката мисија за избори (НМИ) за предвремените парламентарни избори закажани за 5 јуни.
Мисијата е предводена од амбасадорот Јан Петерсен и се состои од главен тим од 12 експерти, со седиште во Скопје, и 24 долгорочни набљудувачи, кои ќе бидат распоредени низ целата земја, во тимови по двајца, започнувајќи од 13 април.
Дополнително, ОДИХР ќе побара земјите-членки на ОБСЕ-ОДИХР да обезбедат 300 краткорочни набљудувачи. Краткорочните набљудувачи ќе пристигнат неколку дена пред денот на изборите.
Мисијата ќе ја оценува усогласеноста на овие избори со заложбите на ОБСЕ и другите меѓународни обврски и стандарди за демократски избори, како и со домашните прописи.
Набљудувачите внимателно ќе ги следат регистрацијата на кандидатите и гласачите, активностите во кампањата, работата на изборната администрација и соодветните владини институции, изборната регулатива и нејзината имплементација и решавањето на изборните спорови.
Како дел од набљудувањето, Мисијата исто така ќе го следи и известувањето на медиумите за кампањата.
Во текот на набљудувањето, Мисијата ќе оствари средби со претставници на државните власти, политичките партии и кандидатите, и со претставници на граѓанскиот сектор, медиумите и меѓународната заедница.
На денот на изборите набљудувачите ќе го следат отворањето на гласачките места, гласањето, пребројувањето на гласачките ливчиња и сумирањето на резултатите.
На денот на изборите, Набљудувачката мисија на ОБСЕ/ОДИХР ќе ги здружи своите напори со делегациите на Парламентарното собрание (ПС на ОБСЕ) и Парламентарното собрание на Советот на Европа (ПССЕ).
Мисијата ќе објави два периодични извештаи во текот на својата работа. На прес- конференција, на денот по изборите, ќе биде објавена изјава за првичните наоди и заклучоци.
ОДИХР ќе објави конечен извештај за набљудувањето околу осум недели по завршувањето на изборниот процес.