Обвинетите службенички во случајот „Тврдина 2“, во своите завршни зборови пред судијката Лидија Петровска рекоа дека не се чувствуваат виновни затоа што се што направиле било по наредба на претпоставениот, екс-началникот на Петтата управа, Горан Грујевски.
„Во УБК сум долги години и секогаш својата работа сум ја работела професионално без никакви забелешки. Секогаш сум ги почитувала наредбите на претпоставените и сакам да кажам дека и во овој случај постапував исклучиво по наредба на претпоставениот началник“, рече една од обвинетите.
Со овој исказ се сложија и останатите пет обвинети во случајот „Тврдина 2“.
Непосредно пред нивните завршни зборови, обвинителката од СЈО, Ленче Ристоска, за Грујевски, кој е првообвинет во случајот, побара максимална затворска казна.
Таа побара судот да ги цени отежнителните околности, односно тоа што обвинетиот иако знаел дека постапката е во тек, избегал.
За останатите шестмина обвинети, Ристоска побара алтернативна казна и побара судот да ги цени отежнителните околности како тоа што ниту една од нив не се покајала за дејството, но и олеснителните околности како тоа дека ниту една од обвинетите нема никаква дамка во службата во претходното работење.
Ристоска во своето излагање рече дека мотивот за уништувањето на документацијата е очигледнони јасно – „да се уништат доказите за лицата кои го правеле прислушувањето”.
Одбраната на Грујевски составена од адвокатите Љупчо Шврговски, Миле Петровски и Петар Василев побара судот да ги ослободи обвинетите од обвиненијата, бидејќи во овој случај, според нив, не постоело кривично дело, а воедно ја спорат и надлежноста на Специјалното јавно обвинителство за овој случај.