Три години откако судскиот предмет на поранешното Специјално јавно обвинителство „Талир 2“ влезе во судница, деновиве ја бранува политичката јавност со пресудата на судечкиот совет предводен од судијката Даниела Алексовска Стојановска која побара и конфискација на партиското седиште на ВМРО-ДПМНЕ и на друг имот на партијата низ земјава.
Државниот јавен обвинител, Љубомир Јовески овој сложен судски предмет ѝ го довери на обвинителката Ленче Ристоска која го внесе во судницата во Кривичниот суд во Скопје кон средината на септември 2019 година.
Стамена и сигурна во доказите, тогаш Ристоска порача дека Обвинителството ќе докаже дека со злоупотреба на службената положба осомничените овозможиле правното лице „Бетон“ АД Скопје да го изгради седиштето на политичката партија ВМРО-ДПМНЕ, иако во времето на обезбедување на услугата тоа имало склучено договори за јавни набавки со државни органи и јавни установи или претпријатија спротивно на Законот за политичките партии, Законот за финансирање на политичките партии и на Законот за облигационите односи.
По изречената пресуда побаравме реакција од обвинителката Ристоска која заедно со обвинителот Љубомир Лапе работеше на предметот „Талир 2“.
– Во рамки на предметот „Талир 2“ беа обезбедени и презентирани голем број вербални и материјални докази со кои обвинителството успеа да ја докаже теоријата на случај и да го убеди судот дека се работи за корупциски предмет скриен зад бројни правни акти и процедури. Поради тоа задоволни сме што судот ги препозна коруптивните аспекти и донесе осудителна пресуда, изјави обвинителката Ристоска за Нова.
Освен партиското седиште на ВМРО-ДПМНЕ, како што објавивме претходно, според одлуката на судот се конфискува и имот на партијата во Берово, Македонска Каменица, Новаци, Велес, Струмица, Кавадарци, Кисела Вода, Охрид, Пробиштип, Лозово, Кочани, Струга, Нов Дојран, Неготино, Петровец, Богданци, Градско.
– Воедно, задоволни сме и со околноста што судот ги прифати аргументите на обвинителството и донесе одлука и за одземање на предмети и конфискација, што е исклучително важно од аспект на генерална превенција за ваков вид на кривични дела, изјави Ристоска.
Колегата на Ристоска, обвинителот Љубомир Лапе кој го застапуваше предметот до пресудата побара затворски казни и за двајцата обвинети Никола Груевски и Кирил Божиновски и рече дека нема олеснителни околности ни за поранешниот генерален секретар на ВМРО-ДПМНЕ , а откако на Божиновски судот му одреди условна казна од две години најави дека прво ќе ја разгледа пресудата, па ќе одлучи дали ќе поднесе жалба.
Ленче Ристоска пред три години и на рочиштето за незаконското финасирање на ВМРО-ДПМНЕ познато во јавноста како „Талир“ порача дека Обвинителството ќе докаже дека обвинетите презеле низа активности за незаконско финансирање на ВМРО-ДПМНЕ, со што оствариле финансиска предност за партијата од околу 4.6 милиони евра во однос на другите партии.
Инаку, Ристоска во 2018 година беше избрана за прв обвинител за врски со Македонија во Единицата за судска соработка на ЕУ, Еуроџаст (Eurojust). Со нејзиното назначување на земјава тогаш ѝ се отвори патот за посилна соработка со Еуроџаст во борбата против прекуграничниот криминал меѓу земјите членки на ЕУ и земјите од Западниот Балкан.
Стојанка Митреска