Основното јавно обвинителство Скопје побара притвор за сопственикот на порталот Доказ, Марјан Стаменовски. Во соопштението до јавноста, обвинителството не го именуваше Стаменковски но извести дека е побаран притвор „за лице осомничено дека сторило кривично дело – уцена од чл.259 ст.1 в.в. чл.19 од КЗ, кривично дело – пиратерија на аудиовизуелно дело од чл.157-б ст.1 од КЗ, две кривични дела – ширење на расистички и ксенофобичен материјал по пат на компјутерски систем од чл.394-г. ст.1 од КЗ и кривично дело – злоупотреба на лични податоци од чл.149 ст.1 од КЗ“.
Во соопштението се додава дека притворот е предложен бидејќи на товар на осомничениот му се ставаат повеќе кривични дела сторени од позиција сопственик на интернет портал, преку кој, искористувајќи познанства и релации со различен профил на лица, преземал противправни дејствија во континуитет, што упатува дека ќе ги презема и во иднина доколку не му биде определена мерка притвор и биде оставен да се брани од слобода.
Осомничениот се служел со сопствениот интернет портал, знаејќи дека е достапен на неограничен круг лица, како средство за ефективен притисок врз жртвите, притоа предизвикувајќи лавина општествени последици со несогледива штета во форма на религиска омраза и ксенофобични идеи, наведуваат од Обвинителството. „Дополнителна околност во таа насока е потребата да се заштитат жртвите, кои биле подложени на изразен говор на омраза и закани преку компјутерски систем и преку интернет порталот на осомничениот“, додаваат од таму.
Во прилог на барањето за притвор, обвинителот посочува и дека постојат околности кои укажуваат на опасност од бегство. „Со оглед на широкиот круг на потенцијални жртви од активноста на веб порталот на осомничениот во подолг временски период, Основното јавно обвинителство Скопје охрабрува и други евентуални оштетени од вакви кривични дела да ги пријават“, се вели во соопштението.