Клиниката за очни болести испрати демант на денешната прес конференција на СДСМ, каде се вели дека петнаест оперирани пациенти на Клиниката за очни болести се соочуваат со сериозна инфекција на очите поради загадениот препарат Авастин. Реакцијата ја пренесуавме во целост.
„Во врска со денешната прес-конференција на СДСМ, УК за очни болести најостро ги демантира и одговорно тврдиме дека оперативниот блок во нашата ЈЗУ не е затворен и работи со редовен оперативен програм. Исто така демантираме за наводно загадување на препаратот авастин, зашто тој се користи исклучиво по строг медицински и светски утврден протокол.
Демантираме дека досега постојат т.н 15 оперирани пациенти кои се соочуваат со сериозна инфекција на очите (како што беше изнесено на денешната прес конференција одржана од страна на горенаведените). Исто така, одлучно ги негираме изнесените тврдења за т.н несоодветни болнички услови, ниту пак податокот дека во нашата клиника се употребуваат т.н загадени препарати за очи.
Во интерес на вистината, сакаме да информираме дека само кај неколку пациенти забележана е компликација по спроведени третмани и истото веднаш е пријавено до соодветните надлежни институции и за таа цел, веднаш беше формирана Комисија за стручен надзор, преземени се сите потребни превентивни мерки и пациентите се во добра општа состојба.
Повторно ги информираме нашите пациенти и сите граѓани во Р.Македонија дека работиме вообичаено без прекин на оперативниот програм.
Крајно сме изненадени од изнесените невистини на денешната прес конференција на горенаведената опозициска политичка партија и тоа токму во п0ериод на најголем позитивен резултат од работењето на Клиниката.
Наместо заклучок, во Р.Македонија постојат субјекти кои само си ја работат својата должност, а исто така има субјекти во Р.Македонија кои непрецизно зборуваат во континуитет.
Ви напоменуваме дека овој наш допис до медиумите ќе биде прв и последен во исто време по ваков повод а понатаму нема да се допишуваме по медиуми туку ќе преземеме употреба на соодветни правни инструменти против секој кој ќе се обиде да и наштети на ЈЗУ Универзитетска Клиника за очни болести Скопје“, се вели во реакцијата од Клиниката за очни болести.