Од 1 декември се враќа евтината дневна тарифа за електричната енергија во периодот од 13 до 15 часот, објави денеска на прес-конференција претседателот на Регулаторната комисија за енергетика (РКЕ) Марко Бислимоски.
Тоа, посочи Бислимоски, е максимумот што можевме да го направиме и очекуваме во наредниот период да почне промената на броилата.
„Евтината тарифа не ја воведуваме од какви било политички причини, туку заради сигналот на цената на електрична енергија на сите берзи во Европа, вклучувајќи ја и нашата. Цената на електричната енергија осум месеци наназад е пониска дури и од цената после 24 часот“, рече Бислимоски.
Од друга страна Меѓународниот монетарен фонд (ММФ) во своите согледувања по јунската мисија во земјава, изнесе мислење дека Владата треба да го намали субвенционирањето на цената на електричната енергија за домаќинствата бидејќи тоа може да ги загрози јавните финансии. Предлогот на ММФ е да бидат субвенционирани само навистина сиромашни семејства, а не сите. ММФ исто така ја поздрави реформата со воведувањето на блок тарифите, и напомена дека цената на електричната енергија во Македонија е најниска во Европа.
С.К.