Воздухот во Кина е еден од најзагадените во светот, така што и маските за заштита станаа практика во најнаселената земја во светот.
Како што се зголемува трендот на користење, така се развива и модата со нив. Од Париз до Шангај, дизајнерите во маските вметнуваат разни парчиња и шаренила.
Венг Жиун, дизајнер од Пекинг сетоа тоа го крева на малку повисоко ниво. Од искористени патики, креира модерни маски. Концептот е преку нив да се покрене свеста кај Кинезите за високо загадениот воздух.
– Маските оставаат впечаток, но тие исто така покажуваат дека преку основни работи што ги користеме во секојдневието можеме да го промениме животот, вели Жиун.
Тој смета дека ако барем малку успеал да ја покрене свеста за здрава животна средина, тој е задоволен.
Од 2014 година почнува да прави заштитни маски а досега има дизајнирано колу 20 различни типови.
Неодамна тој произведе маска од патики на популарниот Канје Вест, кои на И-беј достигнуваат и до10.000 долари. Тој ги купил за 700 долари.
– Не ги ни носев. Ги купив и ги распарчив за да ја сошијам маската, потенцира дизајнерот.
Кога маската („Јизи“) ја огласил на И-беј во Кина, добил понуда и од 5.000 долари.
Но иако трансакцијата на парите била блокирана од И-беј поради прекршување на одредени регулации, тој е задоволен што истата стигнала на Запад.
– Многу сајтови од Запад кои се посветени на модата, ја презентираа „Јизи“ маската, а многу други мои маски исто така привлекоа внимание. Почнаа луѓе да ме прашуваат каде може да ги купат, раскажува Венг.
Дизајнерот од Пекинг потенцира дека маските не ги прави за од нив да извлече профит, туку институциите и луѓето да се фокусираат на загадениот воздух во Кина.
Венг Жиун претходно работел како графички дизајнер во Пума и Сачи&Сачи, а дизајнирал претходно и Најк патики по своја креација.
Денес за да изработи една маска потребни му се околу пет дена.
Досега спортскиот бренд Пума и брендот за часовници Своч го контактирале да работи на нивни проекти.