Тие што екстремно трошат електрична енергија за копање биткоини, ќе плаќаат екстремно висока цена. Но, ќе треба да бидат регистрирани сите оние кои го прават тоа и да плаќаат даноци. Факт е дека сега трошат евтина цена за домаќинствата, но со новиот тарифник кој треба да се донесе некаде во јуни работите ќе се сменат. Ќе има јавна расправа во која ќе учествуваат сите заинтересирани страни, рече претседателот на Регулаторната комисија за енергетика Марко Бислимоски.

Бислимовски, во интервју за Утрински брифинг, испрати и порака до граѓаните за поголемо штедење на струјата и најави измени во начинот на кој домаќинствата можат да трошат електричната енергија за тоа да го прават рационално.

„Треба да сфатиме дека мора да се штеди бидејќи сме енергетско увозна земја. Цените на струјата се во драматичен раст. Затоа ќе воведеме блокови за домаќинствата за да се ограничи потрошувачката на струја, односно да се троши рационално. Ќе има два или три блока за скапата тарифа, а евтината тарифа нема да има блокови и ќе биде неограничена по иста цена. За скапата тарифа и поделбата на блокови собираме податоци за да определиме една точна категоризација на блоковите. Има потрошувачи кои живеат во згради и се греат на струја и поентата е тие да не бидат казнети оти немаат услови за друг вид греење. Но, имаме домаќинства, обично богати домаќинства, кои имаат енормна потрошувачка на струја“, вели Бислимоски.