Најмалку девет лица загинаа додека стотици се ранети и повредени во судирот на демонстрантите и безбедносните сили за време на вчерашните масовни протести во Багдад и јужниот град Диванија, соопшти ирачката Влада и претставници на невладина комисија за човекови права.
Илјадници Ирачани излегоа на улица да изразат незадоволство од лошата економска состојба во земјата, од невработеноста и од корупцијата, а дел од нив палеле канцеларии на политички партии. Протестите ескалираа набрзо по забранетиот собир на демонстрантите на плоштадот Тахрир по што безбедносните сили се обидоа со употреба на борбена муниција и солзавец да ја растераат толпата и во таа прилика згаснаа седум човечки животи. Подоцна, според полициски извори, е убиен уште еден демонстрант во Зафание, јужен кварт на Багдад.
Масовната беше излезноста на улица и во јужните градови Насирија и Диванија и покрај забраната на властите. Во Диванија е убиен најмалку еден демонстрант во момент кога учесниците на протестот почнале да се приближуваат до просториите на локалните власти. Во Насирија демонстрантите запалиле канцеларии на три политички партии и еден пратеник, на што безбедносните сили одговориле со огнено оружје, и засега нема податоци за жртви во тој град.
За време на демонстрациите во Багдад приведени се најмалку 39 лица, а светските агенции јавуваат дека за пет дена во Ирак загинале 73 лица.