Германскиот суд во Лајпциг ја одложи одлуката за тоа дали ќе се забранат дизел возила во големите германски градови
Расправата е околу одлуката која би влијаела на над 15 милиони дизел возила кои би биле опфатени со забраната.
Доколку судот ја потврди забраната, таа ќе се однесува на дизел модели произведени до 2014 година, кои задоволуваат Euro 5 норми.
Судијата Андреас Корбмахер изјави дека одлуката е одложена и германскиот управен суд ќе донесе одлука на 27 февруари.
Тогаш Сојузниот управен суд во Лајпциг ќе донесе одлука дали се легални забраните кои ги донесоа некои локални судови кои ги бараше во своите обвиненија невладиното здружение за заштита на околината и потрошувачите DUH.
На ова реагираше и канцеларката Ангела Меркер, која лобиташе против забраната, бидејќи смета дека ова може да предизвика големо незадоволство кај граѓаните и значајно да го наруши секојдневното живеење во градовите.
Дизел моделите на автомобили се најдоа на „црната листа“ откако беше откриено дека Volkswagen лажел на тестовите во врска со емисија на штетните гасови.
Работите се влошуваа по истите вакви обвиненија и за Mercedes-Benz и BMW, па се поголем е бројот на европски метрополи кои донесуваат мерки против дизелите.
Дозволената граница на загадување на воздухот е пречекорена во 70 градови, во 20 дури премногу, покажуваат истражувањата на загадувањет на воздухот во Германија. Последните истражувања на КАР-центарот за истражување на мобилноста на Универзитетот Дуизбург-Есен, се спроведени во првите шест недели од оваа година, при што со 399 мерни станици се мерени вредностите на азотен оксид во 35 градови.
Ваква забрана би била голем удар за германската автомобилска индустрија. Затоа се поголем број производители се свртуваат кон производство на хибридни и електрични возила, а некои (како Porsche) дури најавија и елиминирање на дизел моторите во целост во блиска иднина.
Дизел-скандалот и дискусијата за можни забрани за возење доведоа до тоа бројот на новорегистрираните дизел-автомобили да падне прилично многу – во 2017 година е забележан пад од 13%. Истовремено, регистрирани се 14% повеќе новорегистрирани „бензинци“.