Рочиштето кое денеска требаше да се одржи во Врховниот суд за случајот „Монструм“ е одложено, бидејќи полицијата не можела да донесе еден од осудените. Тоа е презакажано за трети октомври.
Врховниот суд треба да ги разгледува жалбите за пресудите за доживотен затвор кои ги донесе Основниот суд Скопје 1, а потоа ги потврди и Апелација. Поради неможноста полицијата да го донесе осудениот, и другите четворица биле известени дека нема услови да се одржи јавната седница.
За наредното рочиште, претседателот на Врховниот суд кажа оти ќе издаде наредба за сите да бидат донесени.
Од одбраната, пак, уште еднаш потенцираа дека овој случај треба да го преземе Специјалното јавно обвинителство за, како што велат, конечно да се дознае вистината.
Според адвокатот на обвинетите Насер Рауфи, Специјалното јавно обвинителство треба да го преземе предметот за да се дознае вистината.
– СЈО има компетенции и треба да го преземе овој случај, затоа што само на тој начин ќе се дојде до вистината за овој предмет, изјави Рауфи.
Врховните судии на јавна седница треба да ги разгледаат жалбите за доживотните затворски казни, кои на осудените им ги изрече Основниот суд, а ги потврди и Апелацискиот суд. Седницата досега беше неколку пати одложувана.
Во случајот пред Врховниот суд постапува обвинителката Лилјана Спасовска, која неодамна беше назначена за вршител на должноста државен јавен обвинител на местото на разрешениот Марко Зврлевски.
Петтемина обвинети беа осудени на доживотен затвор за петкратното убиство кај Смилковското езеро, кое се случи на 12 април 2012 година