Денеска се навршува една година од воведувањето на косовските такси за српските производи, најпрво во износ од 10 отсто, а по 12 дена и за цели 100 проценти. Мерката нанесе голема економска штета на двете страни од границата, но уште повеќе политичка, со оглед на тоа што го блокира дијалогот меѓу Белград и Приштина.
Приштина се одлучи на овој чекор откако и беше одбиено членството во Интерпол, на заседание на Генералното собрание на оваа меѓународна полициска организација во Дубаи, пренесува агенцијата „Танјуг“.
Иако економските ефекти се значителни, од почетокот беше јасно дека не се работи за економска, туку за пар екселанс политичка мерка, коментира „Политика“.
Идејата беше да се изврши притисок врз Србија да запре со „кампањата” за повлекување на признавањата на косовската независност што само во текот на оваа година го сторија 15 земји, пишува весникот.
Таксите, меѓутоа, го блокираа дијалогот, но Приштина остана упорна, иако Брисел и Вашингтон, а потоа и речиси целата меѓународна заедница, бараа нивно укинување, очекувајќи, во исто време и Белград да ги запре напорите за повлекување на признавањето, потсетува „Политика“.