Со највисоки државни и воени почести, македонскиот претседател Стево Пендаровски денеска ја почна официјалната посета на Полска. Во Варшава, тој беше пречекан од својот домаќин, полскиот претседател, Анджеј Дуда.
По тет-а-тет средбата на претседателите Пендаровски и Дуда, делегациите на двете држави одржаа пленарен состанок на кој се потврдија искрените пријателските односи и политички дијалог. Полска е постојан поддржувач на нашите евро-атлантски интеграции и за време на посетата на претседателот Пендаровски се очекува да биде реафирмирана поддршката за Северна Македонија да отпочне претпристапни преговори за ЕУ.
Претседателот Пендаровски, како што соопштија од неговиот кабинет, ќе оствари билатерални средби со Маршалот на Сејмот, Елжбиета Витек и со Маршалот на Сенатот, Томаж Гроцки, а ќе се сретне и со истакнати слависти и македонисти кои живеат и работат во Полска. За време на престојот во Варшава, претседателот Пендаровски е придружуван од сопругата, Елизабета Ѓоргиевска.