Референдумот во Босилово против изградбата на рудници на територијата на општината е неуспешен.
Општинската изборна комисија во Босилово и официјално соопшти дека на референдумот излегле 32,45 отсто од регистрираните гласачи или гласале 3.992 гласачи, односно 2.159 помалку од потребниот минимум за референдумот да успее.
Од невладината „Здрава котлина“, која е иницијатор за референдумот, велат дека ваквиот исход е катастрофален и срамен, но посочуваат на многу нерегуларности.
Најавија дека нема да се откажат од стопирање на рудникот за бакар и злато кај Иловица туку ќе поднесат барање до Владата и сите други институции да се направи ревизија на тој проект и ревизија на сите студии кои се преполни со работи кои се штетни за самата природа, човечкото здравје.
НОВА ТВ неколку пати побара од Владата да обелодени што содржи договорот за концесија и експлоатација на бакар и злато во рудникот во Иловица. минатата недела и министерот за економија Крешник Бектеши на прес конференција одби да го стави на увид на јавноста документот со Еуромакс Ресоурсес Лимитед, канадската компанија која што доби договор со претходната влада да вади злато во ова струмичко село.
Според него во него нема ништо спорно.
Договорот за рудникот Иловица и натаму под превезот на тајноста
НОВА ТВ се обиде договорот за концесија на рудникот Иловица да го добие од Министерството за економија согласно Законот за слободен пристап до информации од јавен карактер, но оттаму ни испратија допис со одговор дека „предметот е во постапка на усогласување при што доставувањето на содржината би предизвикало погрешно разбирање на содржината“.