Основното јавно обвинителство – Скопје вечерва соопшти дека по прибирање на доказниот материјал за петнаесеттемина инволвирани во нередите кај Собранието првично започна постапка поради постоење на основано сомнение дека сториле кривично дело – Учество во толпа што ќе спречи службено лице во вршење на службено дејствие од член 384 од Кривичниот законик.
„Во моментов, седум од лицата се лишени од слобода. Надлежен јавен обвинител, ценејќи дека се исполнети законските основи, за четиринаесет од осомничените предложи до судија на претходна постапка да им биде определена мерка притвор. За едно лице е предложено определување на мерки на претпазливост“.
Од ОЈО Скопје не наведуваат дали меѓу приведените се и организаторите на протестите, за кои МВР до нив испрати писмо со кое бара под итно да се повикаат на сослушување и да им се одредат мерки за обезбедување на четири лица за кои се обезбедени докази дека биле организатори и водачи на насилството врз пратениците кое се случи во четвртокот во Парламентот.
Истрагата на обвинителството продолжува во насока на целосно расветлување на кривично – правниот настан, соопштија од Обвинителството.