Во текот на вчерашниот ден Основното јавно обвинителство Скопје до судија на претходна постапка поднело предлог за определување на мерка Притвор за осомничен по сите основи и тоа: поради постоење на опасност од бегство, попречување на истрагата и можност за повторување на кривичното дело, за учество во случувањата во Собранието на 27.април кога беа нападнати пратениците од тогашната опозицијата и новинарите.
„Предлогот е поднесен бидејќи од досега прибавените докази од страна на Основното јавно обвинителство – Скопје произлезе дека покрај за кривично дело Неовластено изработување, држење, посредување и тргување со оружје или распрскувачки материи од чл.396 од Кривичниот законик, постои основано сомнение дека осомничениот преземал дејства како водач на толпа во врска со случувањата во Собранието на Република Македонија од 27 април годинава“, се вели во соопштението од ОЈО.
Поради тоа, надлежниот јавен обвинител донел наредба за спроведување на истражна постапка и за кривично дело Учество во толпа што ќе изврши кривично дело од чл.385 ст.3 од Кривичниот законик, за кое дело пропишана е казна затвор од една до 10 години.