Основното јавно обвинителство за гонење на организиран криминал и корупција ќе постапува по кривичната пријава во врска со снимањето на играна серија
Управата за финансиска полиција до Основното јавно обвинителство за гонење на организиран криминал и корупција денеска поднесе кривична пријава против едно лице за основано сомнение дека сторило кривично дело Злоупотреба на службена положба и овластување од чл. 353 став 5 в.в. став 1 од Кривичниот законик, соопшти ОЈО.
-Лицето како раководен субјект на Агенцијата за филм во периодот од октомври 2016 година до септември оваа година, искористувајќи ја својата службена положба и пречекорувајќи ги границите на своето службено овластување го оштетило Буџетот на Република Македонија за износ од 68.000.000,оо денари. Имено, при постапката за финансирање на Проектот – играна серија ‘‘Македонија‘‘, осомниченото лице овозможило Друштвото за филмска и видео продукција „Јадран Филм“ ДООЕЛ Скопје да се стекне со противправна имотна корист во погоре наведениот износ, а на штета на Буџетот на Република Македонија, се вели во соопштението.
За овој случај Основното јавно обвинителство за гонење на организиран криминал и корупција по известување од Управата за финансиска полиција, минатиот месец отвори предистражна постапка, денешната кривична пријава е земена во работа и за тоа се води постапка.
Агенцијата за филм на Република Македонија минатиот месец објави дека ги вратила назад првите 300.000 евра државни пари од хрватската продукција „Јадран филм“ како последица на неисполнувањето на договорот за производство на играната серија „Македонија“.
Согласно правосилно извршно решение, Агенцијата за филм тогаш информира дека направила поврат на речиси 19 милиони денари, колку што имало на сметката на „Јадран филм“ во моментот кога била блокирана.
„Ова не е целосната сума која државата му ја исплатила на хрватскиот продуцент Винко Грубишиќ. Таа изнесува 68 милиони денари или 1.100.000 евра со обврска тој до септември годинава да достави готови епизоди од првата сезона. Како ќе се наплати остатокот ќе знаеме по завршување на истрагата на Јавното обвинителство и Финансиската полиција кои ја проверуваат документацијата за целиот период, од објавениот конкурс во декември 2015 до 4.септември, кога истече рокот за предавање на 14 епизоди од серијалот“, се вели во соопштението од Агенцијата за филм.
Хрватската продукција „Јадран филм“ имаше обврска до септември годинава да достави готови 14 епизоди од серијалот „Македонија“ но тоа не беше сторено и договорот со нив беше раскинат затоа што во него постои извршна клаузула.