Од Јавното обвинителство денеска соопштија дека надлежен обвинител од Основното јавно обвинителство – Гостивар изврши увид во центарот на Кичево, на местото каде вчера се случи вооружен инцидент во кој се повредени 3 лица.
-Според првичните сознанија до инцидентот дошло кога лицето А.А од зад грб испукало неколку куршуми од пиштол кон А.А и А.Д. При нападот со лесни телесни повреди во пределот на потколеница се здобил и случаен минувач. Поради сериозноста на повредите А.А и А.Д се пренесени на лекување во скопските клиники.
При увидот јавниот обвинител издаде наредби за собирање на траги од лице место, за вештачење, фотографирање и скицирање на местото на настанот, се вели во соопштението од ОЈО.
Во текот на денешниот ден Основното јавно обвинителство – Гостивар до судија на претходна постапка при Основниот суд – Гостивар ќе достави Предлог за определување на мерка – притвор за сторителот.
Носителот на независна листа советници во Кичево Алит Абази кој беше најтешко ранет во вчерашниот вооружен инцидент во Кичево, бил опериран и е во стабилна состојба.
Покрај него, ранети се и шефот на неговиот изборен штаб Дестан Абдиу и Шабан Далипи, кои исто така се во болница.
Кон тројцата пукал 58 годишниот А.А. од Кичево.
Полицијата веднаш по инцидентот го привела напаѓачот А.А. Според првичните сознанија, мотив за нападот се меѓусебни нерасчистени недоразбирања за кои се водела и судска постапка.
МВР соопшти дека инцидентот се случил во 18,40 часот во Кичево на бул. “Ослободување“ А.A.(58) од с.Горно Строгомиште, кичевско, кога ги пресретнал Д.А.(58) од Кичево, А.А.(40) од с.Србјани, кичевско, и Ш.Д. (54) од с.Грешница, кичевско, и со пиштол почнал да пука кон нив.
Притоа, Д.А. се здобил со повреда во пределот на десниот бут, А.А. се здобил со повреда во пределот на слабината, по што на истите им била укажана медицинска помош во Медицинскиот центар во Кичево, а потоа, поради сериозноста на повредите, двајцата се пренесени во Клиничкиот центар во Скопје. Ш.Д. се здобил со повреда во пределот на десната потколеница и бил пренесен во Медицинскиот центар во Кичево и по укажаната медицинска помош бил пуштен на домашно лекување.
Напаѓачот А.А. е приведен во ПС-Кичево. Увид на местото на настанот извршиле Јавен обвинител и увидна екипа од ПС-Кичево.
Се преземаат мерки за целосно расчистување на случајот.