Основното јавно обвинителство оформило предмет за да се утврди идентитетот и околностите под кои беше нападната новинарската екипа на НОВА ТВ додека ги снимаше лицата кои во трговскиот центар „Бисер“ се потпишуваа против изградба на наводни кампови за мигранти, информираа од ОЈО – Скопје.
„ОЈО-Скопје прими известување од страна на Министерството за внатрешни работи во врска со настанот случен на 23 август, кога при извршување на работните задачи беше нападната новинарската екипа на интернет порталот НОВА ТВ .По приемот на известувањето, Основното јавно обвинителство – Скопје веднаш оформи предмет и истиот го распореди кај дежурен јавен обвинител. Од страна на обвинителот се издадени наредби и насоки кои имаат за цел утврдување на идентитетот на сторителот и целосно расветлување на настанот, по што ќе следи мериторна јавнообвинителска одлука“, пишува во соопштението на ОЈО.
Екипата на НОВА ТВ на 23 овој месец беше нападната од лицето А.Б. (38) од Скопје којшто најпрво ја нападна нашата новинарка на терен како што заведува МВР (со насилно однесување, туркање на телефонот и со влечење и виткање на раката) а потоа и снимателот на НОВА, (со удар во камерата со која снимал).