Основното јавно обвинителство Скопје започнува постапка за расветлување на околностите под кои двајцата македонски планинари, Калина Велевска и Александар Миновски загинаа на планинскиот врв Кајмакчалан.
Во соопштението, ОЈО наведува дека „надлежен јавен обвинител издал Наредба до Секторот за внатрешни работи Скопје – Единица за насилен криминал за да се извршат проверки во Федерацијата на планинарските спортови на Македонија по однос на тоа кој, кога и како ја организирал планинарската експедиција, кои се потребните услови за таква организација и дали тие биле исполнети, како и други околности.
Во исто време, издадена е Наредба да се направат проверки и во планинарското друштво „Трансверзалец“ – Скопје, нивните акти и одлуки врз основа на кои се организираат планинарските експедиции, потребните услови што треба да се исполнат, како и околностите под кои се спроведувало искачувањето на Кајмакчалан.
По Наредба на надлежниот обвинител треба да бидат обезбедени и листинзите на појдовни и дојдовни повици од мобилните телефони на починатите планинари.
Досега во јавноста беа објавени извештајот на Федерација, во кој само редоследно по сатница се наведува како се одвивала турата, но без детали. извештајот завршува со моментот, кога според друштвото Трансверзалец прекинала комуникацијата со двајцата планинари.
Но подоцна во јавноста се појавија извештајот и изјави од грчките спасувачки служби кои не се поклопуваат во целост со она што е напишано во извештајот на македонското друштво.
Весникот Нова Македонија во повече наврати деновиве објави написи, дел од смото место на трагедијата, делови од извештаите на грчките спасувачки служби и изјави на одговорните за оваа акција.
Во барањето за обдукција се констатира дека грчките специјални единици за справување со катастрофи ги пронашле Калина и Александар во саботата вечер, во 22 часот, на 10 февруари и се обиделе да го извлечат, односно да го спасат Александар.
-Според документот, специјалците прво се обиделе да го спасат Александар, кој „бил сѐ уште свесен“, употребувајќи ремен за да го извлечат. Во извештајот во кој се наведува изјавата на спасувачот, во текот на извлекувањето поради непозната причина ременот се откачил и Александар „паднал на стрмната падина на уште поголема длабочина“. Грчките спасувачи од Солун изјавиле за полицијата дека Калина „не покажувала знаци на живот, ниту на чувствителност“ и, според нивниот исказ наведен во документот, Калина „веројатно беше веќе почината“. Во документот не се наведуваат детали дека е направен обид за нејзино извлекување, пишува Нова Македонија.
Директорот на ски-центарот „Ворас“, Танос Панајотопулос во интервју за весникот, за она што се случувало во саботата попладне на 10 февруари на падините на Кајмакчалан, вели дека, клучно за акцијата за спасување било времето меѓу 11.30 и 13.30 часот, кога македонските планинари сами ги барале своите исчезнати колеги. Исто така, тој истакнува дека грчките спасувачи немале информација дека планинарите се изгубени уште во 11.30 часот и дека оваа, за него, исклучително важна и пресудна информација ја добиле дури во 16.30 часот, со што што акцијата за спасување би имала сосема поинаков тек.
Планинари и пријатели на двајцата загинати, со денови преку социјалните мрежи укажуваат на нелогичности во извештајот во врска со целиот тек на планинарската тура и особено на како што ги нарекуваат „дупките“ во објаснувањето како течела акцијата за пронаоѓање. Некои од нив укажуваа де теретнот не е „Хималаи“ па да се пребарува со часови, и покрај лошите временски услови.
Семејствата на Калина и Александар преку писмо изразија сомнеж во професионалноста на организаторите на турата и бараат одговорност. Писмото уследи откако Трансверзалец преку Фејсбук страницата се обрати до учесниците на турата и до членовите да не зборуваат јавно за настанот, најавувајќи официјален извештај.