Основното јавно обвинителство за гонење на организиран криминал и корупција по допрен глас поведе предистражна постапка заради постоење на индиции за сторено кривично дело Перење пари и други приноси од казниво дело од чл.273 од Кривичниот законик.
„Предистражната постапка е како резултат на објавените написи од страна на повеќе медиуми во Република Македонија во врска со изјавата на поранешниот српски министер за надворешни работи и претседател на Народната партија во Република Србија, Вук Јеремиќ. Изјавата се однесува на наводно перење пари во Република Србија од страна на високи македонски функционери и нивната поврзаност со физички и правни лица од Србија и Чешка“, соопштија од Јавното обвинителство.
Јавен обвинител од Основното јавно обвинителство за гонење на организиран криминал и корупција ги презема сите потребни дејствија и координација со институциите надлежни за откривање на овој вид на кривични дела.
Istina boli. A sprema se i blamaža države, kada makedonski i međunarodni organi uskoro izađu u javnost sa nalazima istrage. Tako ovaj režim dovodi “strateške partnere” i “strane investitore”. pic.twitter.com/JQKpYhsuWj
— Vuk Jeremić (@jeremic_vuk) December 1, 2017
Претседателот на Народната партија од Србија, Вук Јеремиќ пред неколку дена ги повика истражните органи да ја испитаат врската меѓу Воислав Спарвал, директор на фирмата СЦМГ која го купила крушевачкиот „14 октомври“, со поранешната македонска власт.