Техничкиот преглед на автобусот на компанијата „Дурмо Турс“, кој беше дел од големата сoобраќајна несреќа во близина на село Ласкарци, не бил реализиран според стандардните процедури. Овој став на денешното рочиште за предметот „Ласкарци”, го изнесе обвинителот Дарко Јакимовски, кој истакна дека „автобусот на 2 јули во 2018 година влегол на технички преглед во 14:16 часот и излегол во 14:18 часот“.
„При технички преглед на овој автобус може да се види дека нема ниту еден контролор во работниот канал. Исто така, може да се види дека автобусот не подлежи на системот на тресење што е дел од една методологија која се применува кај останатите возила. За илустрација може да се види техничкиот преглед на едно патничко возило „Пежо”. Во овој случај се гледа како контролорот влегува во работниот канал со батерија. Воедно оваа возило се тестира и на системот за тресење“, истакна обвинителот Јакимовски.
Одбраната на обвинитетите негодуваше на овој материјален доказ на обвинителство и истиот го оцени како ирелевантен. Свој коментар на овој доказ даде и обвинетиот Боваровски, кој се гледа на видео материјалот како се движи околу автобусот. Тој истакана дека во овој случај станува збор за вонреден технички преглед на возило наменето за јавен транспорт и истиот престанал да важи кога се реализира редовниот техничи преглед за регистрација (18 декември во 2018 година).
„Техничкиот преглед почнува од 14:12 часот. На снимката може да се види како вршам контрола на стаклата, пневматиците и каросеријата на автобусот. Исто така во еден случај се качувам во автобусот и вршам контрола на копитот. Од кога во внесов возилото во компјутер јас влегувам и во каналот од каде се гледа целото подвожје на автобусот. Гледав да не имаа откачени кабли и констатирав дека нема. На крај автобусот минува на нагазна плоча за мерење на кочниците. Прво беше мерена предна кончница. Децидно тврдам дека имаше и мерење на рачна кочница, па после и на ножната кочница“, истакна обвинетиот Боваровски.
Следното рочиште за случајот „Ласкарци” e закажано на 14 мај. Во предметот се обвинети шест лица, меѓу кои и сопственикот на компанијата „Дурмо турс“, Дурмиш Белули. Според скопското обвинителство, обвинетите се товарат за кривичното дело тешки дела против безбедноста на луѓето и имотот во собраќајот. Во големата сообраќајна несреќа загинаа 16 лица, а над 30 беа повредени.