Финансиските проблеми што дојдоа како последица на политичката криза во Шпанија ги помести и Медитеранските игри за 2018 година. Спортскиот настан првично беше планиран да се одржи наредното лето во Тарагона, но шпански официјални претставници порачаа дека организацијата се поместува за 12 месеци.
Одлуката е донесена со цел да се овозможи повеќе време на официјалните лица и организаторите за вистински начин на реализација на натпреварувањето. Шпанија беше под политичка блокада цели десет месеци, криза што заврши во септември со полагање на заклетва на премиерот Маријано Рахој.
Шпанија ќе биде домаќин на 18. издание на Медитеранските игри на кои е најавено учество на преку 4.000 спортисти од 26 земји. Настанот во 2021 година ќе се одржи во Оран, Алжир.
Медитеранските игри се под окровителството на Интернационалниот олимписки комитет (ИОК). И Македонија е дел од ова спортско натпреварување иако географски не припаѓа на тој регион како и неколку други држави и дебитира на настанот во Мерсин во 2013 година.
Претставници од Африка на Игрите се Алжир, Египет, Либија, Мароко и Тунис, од Азија се Либан и Сирија, од Европа, покрај Македонија, учествуваат и Албанија, Андора, БиХ, Кипар, Хрватска, Франција, Грција, Италија, Малта, Монако, Србија, Црна Гора, Сан Марино, Словенија, Шпанија, Турција и Косово што беше примено во движењето во 2015 година.