Германската канцеларка, Ангела Меркел, денес откри дека омилено животно и е еж, дека сака шпагети и пилешка супа и дека сонува да биде астронаут макар и на еден ден.
Тоа се само дел од приватните детали кои ги откри Меркел одговарајќи на прашања на деца, една недела пред парламентарните избори во Германија на кои таа води битка за својот четврти мандат.
Канцеларката на специјална конференција организирана трпеливо ги слушаше разните прашања – од тоа што направила во борбата против климатските промени, до прашања кој и бил најубавиот момент во животот, на кое одговори дека тоа бил денот кога го запознала својот сопруг.
Повеќе од 150 деца го прифатија отворениот повик на партијата на Ангела Меркел, конзервативната Христијанско – демократска унија, со канцеларката да се сретнат во зградата во која е сместен предизборен штаб во Берлин.
Додека некои од тинејџерите нервозно ги читаа претходно подготвените прашања, помалите деца повеќе се интересираа за Меркел како личност, па едно девојче ја праша кога го изгубила првиот заб.
Германската лидерка откри дека омилена боја и е плава, дека најдобро се чувствува во удoбен кардиган, а дека ужива во пливање и градинарство.
Меркел (63), која нема свои деца, толку и беше пријатно дружењето со децата што го продолжи времето за поставување на прашања, слушаа музика и се забавуваа, а потоа ги повика да се фотографираат со неа.