Невозможно е да се одреди моментот кога започнува падот на еден политичар кој е на висока фукција. Но, аналитичарите се согласни дека американскиот претседател Доналд Трамп преживеа катастрофални 48 часа, по кои никогаш повеќе нема да биде истиот.
Без разлика на мислењата за Трамп, за неговото однесување и за неговото претседателствување, во Вашингтон очигледно започнува обид за отповикување на претседателот.
Двата удари му ги зададоа портретирањето на Трамп во текстот во „Њујорк Тајмс“ објавен од негов соработник во Белата куќа и оној во новата книга на новинарот Боб Вудворд, во кои зборовите на високи претставници на администрацијата го кршат митот за Трамп и култот за него- како суетен, експлозивен од кого сите се плашат.
Последниот напад дојде од внатрешен непријател, кој го следи Трамп одблизу, кој говори во името на припадниците на отпорот, кои иако под превезот на анонимност, сепак се осмелија да кажат.
Тие предупредуваат дека претседателот на Соединетите Држави не е само несоодветен да биде најмоќниот човек во светот, туку е мешавина на незнаење и его, тривијалност, омраза и невнимателност што ја загрозуваат и државата и светот.
За сите негови пофали за историски успеси и за сопствената слика како јак човек, луѓето од Белата куќа им порачаа на Американците: Царот е гол.
-Коренот на проблемот е аморалноста на претседателот. Секој што работи со него знае дека не е приврзан за било какви начела што го водат при донесувањето на неговите одлуки, пишува анонимниот висок претставник на администрацијата во колумната во „Њујорк Тајмс“.
Тој открива дека има дури и разговори меѓу вработените во Кабинетот да се повикаат на 25 амандман за импичмент на претседателот. Вашингтон под водство на Трамп виде се и сешто, но државниот удар би бил нешто многу поголемо.
-Има некој кој работи за претседателот на САД на висока позиција, кој се обидува да го уништи, изјави Мајкл Капуто, поранешен помошник на кампањата на Трамп, за Си- Ен-Ен.
Тешко е да се најде паралела во западната политичка историја за лидер кој преживеал таков удар, бидејќи моќта и стравот што треба да го одржат ваквото челично владеење може многу брзо да го снема во демократките општества, за разлика од автократските држави.
Но, Трамп одамна се спротивставува на предвидувањата за неговото политичко убиство и ги преживеа ударите кои би уништиле кој било од досегашните претседатели. Сепак, ниту еден друг претседател не се соочил со вакви неверојатни лични дискредитации и напади одвнатре како што нему му се случија оваа недела.
Вудворд беше само почеток
Пред ова, Белата куќа веќе доживеа удар од новата книга на новинарот Боб Вудворд “Страв: Трамп во Белата куќа”.
Тој го пренесува длабокиот презир кон претседателот што владее меѓу високите функционери за кои се вели дека го сметаат за “идиот” со основно образование, од кого на светот му треба заштита.
Всушност Вудворд бил само „предјадење“.
„Бомбата“ на Тајмс всушност ги измести администрацијата и претседател од „шините“, а нацијата ја постави во ситуација да биде без стабилен и ефикасен лидер.
-Многумина од високите функционери во неговата сопствена администрација работат внимателно одвнатре за да се спротивстават на делови од неговата агенда и неговите најлоши намери, пишува во колумната високиот претставник на администрацијата.
“Тоа може да биде некакво олеснување во ова хаотично владеење, но Американците треба да знаат дека во куќата има возрасни … и не се работи за тнр. заговор, туку за обезбедување стабилност”.
Целта на колумната беше да се потврдат многу од тврдењата за опасноста од владеењето на претседателот што ги откри Вудворд, сведувајќи ги на минимум напорите на Белата куќа да возврати.
Во Вашингтон веќе се појавија шпекулации за тоа кој е авторот на колумната, најголемиот ваков пишан удар од 1996 година, кога беше објавен романот “Примарни бои”, посветен на Клинтонови, дело на Џо Клајн.
Исто така, се дебатира и околу одлуката на авторот да остане анонимен, и дали треба да се охрабри, да си поднесе оставка и да излезе во јавност.
Што е следно
Двата неверојатни настани всушност отворија прашања кои досега се сметаа за незамисливи: Што ќе се случи ако, како што сега изгледа, Америка нема стабилен, функционален претседател? Дали е можен бунт меѓу неидентификуваните високи функционери што ќе поттикне оставки или би дошло до уривање на структурата на администрацијата?
Ако се обнови дебатата за 25. амандман, на повидок е вистинска уставна криза.
Се разбира, се поставува и прашањето, дали републиканците на Капитол Хил кои му се верни на Трамп ќе се одважат дури и да дискутираат за кризата на компетентност и вознемиреноста што се случува во Белата куќа.
Потоа, тука е прашањето дали оваа криза ќе се одрази на резултатите од изборите за Конгресот што се одржуваат на средина на мандатот на претседателот, при што поразот би можел да ја наруши врската помеѓу Трамп и неговата партија.
Како е да се работи затворен во Западното крило, со гневен претседател, службеници кои работат против него и спектакл на лов на вештерки за да се пронајдат кртовите?
Дали претседателот, гледајќи предавство на секој чекор, ќе отпочне чистка на функционери за кои тој се сомнева дека не можат да бидат лојални на неговата политичка војна, што дополнително ги ситни редовите во Белата куќа?
„Најтемниот час“
Во обид да се справи со својот „најтемен час“ досега, Трамп се појави во Белата куќа сосема смирен и повторно со напади врз медиумот.
-Њујорк тајмс има анонимен уводник – може ли да верувате во тоа? Анонимен – бескорисен уводник, рече Трамп и продолжи да говори за својот неверојатен политички успех, за растечката економија и воена моќ.
Но, набрзо потоа тој се појави на Твитер во сосема поинакво расположение.
-Дали навистина постојат т.нр. “високи административни службеници “или се работи за лажен извор на Њујорк тајмс? Ако оваа анонимна личност – кукавица навистина постои, Тајмс мора, во интерес на национална безбедност, да го предаде веднаш!, напиша Трамп.
Сепак, пожесток напад од Трамп се очекува вечерва, на собирот во Монтана. Тој се надева на топло добредојде од лојалните поддржувачи и дека вестите од Вашингтон можеби нема имаат толку големо влијание во неговата држава.
-Во моето опкружување каде што живеам, во Јужна Каролина, повеќето се многу задоволни од она што го прави претседателот, вели републиканскиот сенатор Линдзи Грем.
Според аналитичарите, и не е далеку од вистината, бидејќи Трамп битката за опстанок на претседателската функција ја води во Вашингтон, против силите кои се обидуваат да го уништат одвнатре.
Извор Си -Ен -Ен