Временскиот рок од 60 дена во кој операторите беа должни да извршат пререгистрација на програмските сервиси што ги реемитуваат е продолжен на 150 дена. Ова беше одлучено на синоќешната седница на Владата која донесе измени и дополнување на Уредбата со законска сила за примена на Законот за аудио и аудиовизуелни медиумски услуги за време на вонредна состојба.
Овој рок, како што информира владината прес-служба, е продолжен со цел операторите да ја исполнат обврската за прибавување на соодветно пропишаната документација од странски радиодифузери и да ја достават до Агенцијата за аудио и аудиовизуелни медиумски услуги. Дополнително, поради обезбедување на соодветни услови за информирање на јавноста во овој период на прогласена пандемија, со оваа Уредба е определена обврска за задолжително реемитување на програмските сервиси кои се веќе пријавени кај надлежниот регулатор од страна на операторите.
Кабелските оператори завчера го прекинаа емитувањето на ТВ програмите во траење од еден час во знак на протест од, како што соопштија наметнати неуставни обврски во Законот за аудио и аудиовизуелни услуги да гарантираат за авторските права на програмите кои само ги реемитуваат и за тоа да сносат кривична и материјална одговорност. Реагираа и на тоа дека на 29 мај, во време на вонредна состојба, е донесена Уредба со која законот е надополнет со уште една обврска, како што наведоа, на штета на операторите и корисниците, што според нив, го доведува во прашање натамошното реемитување на телевизиски содржини на нивната јавна електронска комуникациска мрежа. Оваа Уредба, наведоа, им наметнува обврска на операторите за пререгистрација на веќе регистрираните странски канали во рок од 60 дена.
Министерството за информатичко општество и администрација оцени дека со прекинот е направено прекршување на Законот за електронски комуникации, а ресорниот министер Дамјан Манчевски вчера најави дека ќе имаат средба со сите засегнати страни, потенцирајќи дека новите настани и информации му даваат оптимизам за надминување на проблемот.