Министерот за внатрешни работи, Оливер Спасовски најави дека опремата за прислушување од УБК ќе се сели во ОТА (Оперативна-техничка агенција) која ќе стартува со работа од 1-ви ноември следната година. Министерот Спасовски истакна дека скандалите со масовното прислушување излегувале од УБК и граѓаните живеат со мислата дека се прислушувани и сите го користат изразот: „Да не зборуваме по телефон, ајде да се видиме оти можеби нѐ прислушуваат”.
Тоа мора да се промени, а според министерот ќе се направи преку строга контрола на системот за следење на комуникациите.
На денешниот брифинг со новинарите, Спасовски изрази задоволство од тоа што Предлог-законот за ОТА помина на владина седница. Владата на седница го утврди Предлог законот за Оперативно-техничка агенција (ОТА), со одлука да го достави до Собранието на Република Македонија согласно член 137 од Деловникот на Собранието на Република Македонија.
Министерот Спасовски нагласи дека забелешките на Прибе треба да се почитуваат и треба да се направи строга контрола врз следењето на комуникациите. Со донесување на новиот Предлог закон за основањето на ОТА, МВР веќе нема да може да има пристап до следените комуникации, туку тоа ќе го прави ОТА која ќе ги има медијациските уреди и МВР ќе мора да бара дозвола за било која мерка за следење од ОТА.
Ќе постои посебен систем и ОТА нема да може да ги слуша разговорите и агенцијата ќе биде медијатор меѓу барателот и лицето кое се следи, но нема да е и корисник на тој материјал. Следењето ќе се спроведува по издадени наредби со број, но без идентитет.
Спасовски рече дека во овие шест месеци откако тој е на чело на МВР нема пропусти во делот со прислушувањето, а потврди и дека подвижните базни станици за следење се запечатени и не се користат.
Детали околу тоа колку лица ќе работат во Оперативно-техничката агенција, кој ќе ја предводи и колку тоа ќе чини, министерот не откри, бидејќи како што рече, несериозно е МВР да истрчува со податоци околу финансии пред прво да направат анализа.