Општина Центар денеска преку соопштение одговори на барањата кои дебармаалци ги испратија со вчерашниот протест. Жителите бараа да се ослободат тротоарите и сообраќајниците од паркираните возила за граѓаните да можат да се движат. Од општината одговорија дека барањата на граѓаните се оправдани и дека општината подготвува трајно и системско решение на проблемот.
„Приоритет е да обезбедиме простор за паркирање на повеќе возила во Дебар Маало, за што веќе е најдено решение. Имено, наскоро ќе биде поставен монтажен паркинг помеѓу општината и Министерството за одбрана, со влез и излез од улицата Орце Николов. Паркингот ќе обезбеди место за 270 до 290 возила. Ваквото решение е првиот чекор кон пренасочување на паркирањето и ослободување на тротоарите“, пишува во соопштението на општината.
Од општината велат дека ќе иницираат формирање на координативно тело со претставници од сите надлежни институции.
„Во ова тело ќе бидат повикани претставници на Град Скопје, Министерството за внатрешни работи и ПОЦ и ќе се изработи план за имплементација на решението. Претставници на граѓаните се добредојдени да учествуваат во ова тело, но и да даваат сугестии во фаза на изработка на решението. Општина Центар веќе презема некои мерки за смирување на сообраќајот во Дебар Маало, како што е „Зона 30“. За жал, заради лоша соработка со претходната власт и недоволна контрола од страна на тогашното МВР, ограничувањето не се почитуваше во целост“, велат од Општина Центар.
Дебармаалци вчера на протест побараа неселективно почитување на законите, нов режим кој ќе го намали сообраќајниот метеж, како и изработка на стручни студии за загадувањето, сообраќајните решенија, густината на населеност и инфраструктурата, инсистирајќи тоа да се стори што побрзо, а во меѓувреме да не се издаваат дозволи за нови градби.