„Репортери без граници“ за првпат вклучија шеф на влада на земја-членка на Европската унија на својата листа на „непријатели на слободата на медиумите“. Па така, на списокот се најде унгарскиот премиер Виктор Орбан.
„Откако Виктор Орбан и неговата партија Фидеш дојдоа на власт во 2010 година, тие ги ставија медиумите под нивна контрола чекор по чекор“, објавија од организацијата.
„Јавните медиуми се централизирани преку државниот медиумски холдинг МТВА, кој во себе ја вклучува и единствената унгарска новинска агенција МТИ“, соопштија „Репортери без граници“.
„Регионалниот печат е во целосна сопственост на бизнисмени кои се пријателски расположени кон Орбан, од летото 2017 година. Во есента 2018 година, скоро 500 провладини медиумски компании се споија во холдинг компанија за централно координирање на нивното известување“, се додава во соопштението.
На списокот „непријатели на слободата на медиумите“ сега се наоѓаат 37 шефови на држави и влади, кои се оценети дека ја сузбиваат слободата на печатот.
Нов на списокот, заедно со Орбан, е и бразилскиот претседател Болсонеро, кој постојано има апели против медиумите, како и саудискиот престолонаследник принцот Мохамед бин Салман, кого го обвинуваат за злосторства против човештвото, вклучително и за убиството на новинарот Џамал Кашоги.
Нова на листата е и лидерот на Хонг Конг, Кери Лам. „Во специјалниот административен регион во Кина, весникот„ Епл дејли“, симбол на слободата на печатот, мораше да се затвори во јуни“, додаваат оттаму.
„Репортери без граници“ ја објавува својата листа на „непријатели на слободата на медиумите“ од 2001 година.