Унгарскиот премиер Виктор Орбан изразил благодарност до Красимир Каракачанов за поддршка што ја уживал од ВМРО-БНД за кампањата и политиките насочени против ЛГБТ заедницата во земјата, објавуваат бугарските медиуми.
Во дел од писмото што го објави ВМРО-БНД, Орбан се обратил до Каракачанов со „останавме малку, но важна е борбата“ на што од бугарската партија одговориле дека „унгарскиот премиер не е сам во борбата против нелибералните напади врз законодавството на Унгарија. ВМРО е една од политичките партии што секогаш го поддржувала, а тоа не остана незабележано од Фидес и нејзиниот лидер, Орбан“.
Партијата на Каракачанов не успеа да обезбеди место во новиот бугарски парламент по неделните избори во земјата, втори во само три месеци во оваа година, меѓутоа од таму порачуваат дека „и ВМРО води слична битка како и Фидес во Унгарија од која нема да отстапат и покрај притисокот од меѓународниот фактор“.
– И натаму сме суверени држави кои знаат што е најдобро за нацијата и за државата. Продолжуваме со заложбите за семејство, за права на родителите, за заштита на децата и нивната иднина“, нагласуваат од ВМРО-БНД.
Унгарија води контроверзни политики кон ЛГБТ заедницата што беа и сè уште се мета на критики во меѓународната јавност, особено по неодамнешните законски измени во унгарскиот парламент. Тие беа и тема на Самитот на лидерите на ЕУ за кои се дискриминаторски за сексуалните малцинстцва. Според холандскиот премиер, Марк Руте, искажаните критики кон Унгарија биле најостри и најжестоки на кои досега бил сведок на некој Самит на ЕУ.
Во контекст на критиките кон Унгарија, се надоврзал и Ксавиер Бетел, премиер на Луксембург, и неговата борба да биде прифатен како хомосексуалец.
– Не станав геј, јас сум тоа. Овде не станува збор за избор. И мајка ми мрази што сум геј, но јас живеам со тоа. Во случајот станува збор за основни човекови права, за правото да се биде различен. Имам почит кон вас, меѓутоа ова се црвените линии“, се обратил Бетел до Орбан, пренесуваат европските медиуми.
Унгарскиот закон за ЛГБТ заедницата беше оценет како „срамен“ од претседателката на Евбропската Комисија, Урсула фон дер Лајен која најави дека ќе поднесе прекршочна пријава.