Унгарскиот парламент со двотретинско мнозинство му овозможи на Виктор Орбан да владее со декрет без утврден временски рок. Со овој закон не може да се одржат избори и владата на Орбан ќе може да го суспендира извршувањето на одредени закони. Дополнително, поединци кои објавуваат информации што се сметаат како невистинити или искривени факти, сега се соочуваат со казна од неколку години затвор.
Унгарија е една од многуте европски земји во кои е прогласена вонредна состојба поради коронавирусот со што им се овозможува на властите да преземаат активности без неопходните процедури. Сепак, со овој закон Орбан добива вонредни можности без временско ограничување со што и ако парламентот одлучи да ја укине вонредната ситуацијата, владата може да си ја задржи зголемената моќ.
Оваа одлука на унгарскиот Парламент предизвика голема загриженост во невладиниот сектор кој ја повика меѓународната јавност да го следи развојот на настаните кои оваа криза со коронавирусот би можеле да ја траснформираат во сериозна уставна криза во која се доведени основните демократски начела на унгарскиот устав.
Поранешниот италијански премиер Матео Ренци истапи со реакција во која ја повикува Европската Унија (ЕУ) да изврши притисок врз Орбан.
„Сонував со години за идејата за Соединети држави на Европа. Токму од оваа причина, јас имам право и должност да кажам дека по она што Орбан го стори денес, Европската унија мора да постапи и да го натера Орбан да го промени својот став. Или, едноставно, избркајте ја Унгарија од Унијата“, напиша Ренци на Твитер иако, како што е познато, не постои механизам за исклучување на земја-членка од ЕУ.
Со реакција истапи и германскиот минстер за Европа, Мајл Рот.
„Закон за итни случаи за пандемија – да, ковид-19 бара соодветни одговори. Но, тие не смеат да го загрозат владеењето на правото, да ги ослабат демократските институции или да ги стават во опасност фундаменталните права“, рече германскиот министер за Европа, Мајкл Рот.
Членовите на Европскиот парламент, исто така, кренаа тревога за последниот потег на Унгарија.
„Случувањата во Унгарија се аларм за либералната демократија во Европа и пошироко. Борбата против ковид-19 не треба да значи затворање на демократијата“, објави на твитер претседателот на групата за Обнова на Европа, Дачијан Чилош.
Политичкото семејство на социјалистите и социјал-демократите во Европскиот Парламент предупреди дека ова е обид за демонтирање на демократијата во Европа и ја повикаа Европската комисија да преземе конретни мерки против Унгарија. Со критики на овој потег на Орбан и апел до ЕК се јавија и „Зелените“ во ЕП.
Европската комисија, во меѓувреме, рече дека ја проучува законската регулатива усвоена во унгарскиот парламент. Комисијата „ги оценува мерките за итни случаи што ги преземаат земјите-членки во однос на фундаметалните права. Ова е особено случај за законот донесен денес во Унгарија во врска со вонредната состојба и новите кривични казни за ширење на лажни информации“, рече комесарот за правда Дидиер Рејндерс.